Kryetarja e Kuvendit të Kosovës, Albulena Haxhiu, ka vlerësuar se vendi ka humbur dy vjet për shkak të krizave politike dhe vonesave në konstituimin e institucioneve, duke theksuar se pas zgjedhjes së presidentes Justina Shiroka-Pula janë krijuar kushtet për rikthimin e funksionalitetit institucional.
Në një intervistë për RTK-në, Haxhiu ka thënë se krizat politike kanë lënë shumë punë dhe reforma pa u adresuar, ndërsa ka vlerësuar se marrëveshja për zgjedhjen e presidentes ka shmangur shkuarjen e vendit në zgjedhje të reja.
“Republika e Kosovës i ka pasur dy vite të humbura nëse e marrim shkurtin e vitit të kaluar, kur edhe patën përfunduar zgjedhjet e jashtëzakonshme (në fakt asaj kohe ishin zgjedhjet e rregullta parlamentare) pas një mandati të qeverisë në atë kohë. Dhe për dhjetë muaj nuk arritëm që ta zgjedhim kryetarin e Kuvendit, rezistencë, justifikime nga ana e opozitës”, ka deklaruar Haxhiu.
Duke folur për zgjedhjen e presidentes, Haxhiu ka thënë se dërgimi i vendit në zgjedhje për shkak të kësaj çështjeje do të ishte i pajustifikueshëm.
“Unë konsideroj që ka qenë komplet e pajustifikueshme, pa asnjë arsye që ta çojmë vendin në zgjedhje për shkak të presidentit. Prandaj e vlerësoj që së fundi ne kemi arritur një marrëveshje, ndonëse në momentet e fundit dhe ndonëse jo e si me thënë dakorduar paraprakisht, por mendoj që arritëm për brenda kohës që kishim në dispozicion që ta votonim presidenten, zonjën Shiroka Pula, me një mandat pesëvjeçar”, ka thënë ajo.
Haxhiu ka theksuar se tashmë institucionet kanë përgjegjësi të qarta, duke kujtuar edhe periudhën kur kishte ushtruar detyrën e presidentes për gjashtë muaj.
“Ju e dini që unë kam qenë ushtruese e detyrës së presidentes për një mandat prej gjashtë muajve dhe ka qenë e paqartë, prandaj i ishim drejtuar Gjykatës Kushtetuese se cili do të jetë presidenti apo presidentja në rast se mua më përfundonte mandati”, ka deklaruar Haxhiu.
Ajo ka vlerësuar se vendimi i Kuvendit për zgjedhjen e presidentes e ka shmangur një proces të ri zgjedhor, duke përmendur edhe vendimin e Hagës të 16 shtatorit, të cilin e ka cilësuar të padrejtë.
“Shumë punë kanë mbetur pa u adresuar, shumë reforma që na presin, por konsideroj që tani jemi në rrugë të mbarë për t’i adresuar të gjitha përgjegjësitë që i kemi para qytetarëve”, ka përfunduar Haxhiu.
***********************************************************************************************************
Kryetarja e Kuvendit të Kosovës, Albulena Haxhiu, në emisionin RTK Prime ka folur për strategjinë e Kosovës në Apel të Speciales, duke theksuar se Kosova duhet të jetë mbështetëse e drejtësisë dhe jo penguese e saj.
Ajo theksoi se grupi punues, i kryesuar nga Glauk Konjufca, tashmë ka mbajtur takimet e para, por se procesi është konfidencial.
“Ngutia që në atë mënyrë, pa konsultime paraprake, të procedohej një ligj, kaq i ndjeshëm, ka qenë për mua e paarsyeshme. Ne kemi thënë se mënyra më e mirë për t’u përballur me këtë padrejtësi është strategjia. Vazhdojë të mendoj njësoj, kam mirëpritur vendimin për strategjisë, që kryesohet nga Glauk Konjufca. Pra, ky grup punues, me përfaqësues të institucioneve dhe të grupeve parlamentare, jam shumë e bindur se do të arrijë të hartojë një strategji me të cilën do të arrijmë të jemi mbështetës, jo pengues të drejtësisë, por vetëm t’i ndihmojmë ekipet mbrojtëse në çfarëdo kërkese apo nevoje që ato kanë. Tashmë janë mbajtur takimet e këtij grupi punues. Unë nuk mund të flas më tepër, sepse ky proces është i mbyllur dhe konfidencial. Mund vetëm të theksoj se Kuvendi i Republikës së Kosovës do t’i adresojë çfarëdo kërkese që ka ky grup punues”, tha Haxhiu.
Në intervistë, Haxhiu do të flasë edhe për zhvillimet aktuale politike dhe institucionale në vend dhe rajon, përfshirë vrasjen e Arlinda Zekajt, zbatimin e ligjit për Byronë për Konfiskimin e Pasurisë së Pajustifikueshme, protestat në Shqipëri dhe zhvillimet politike në Serbi.