Presidenti i Shteteve të Bashkuara, Donald Trump, ka njoftuar se është arritur një marrëveshje për “çarmatimin e plotë” të Hamasit dhe grupeve të tjera të armatosura në Gaza, si dhe për tërheqjen graduale të trupave izraelite nga territori.
Sipas Trumpit, marrëveshja është arritur nga “Bordi i paqes” i administratës së tij dhe përbën “një hap kritik drejt qeverisjes së Gazës nga një qeveri e re palestineze”.
Sipas një dokumenti katërfaqësh të siguruar nga BBC-i, plani parasheh një proces të ndarë në faza, që përfshin çarmatimin e Hamasit dhe, paralelisht, tërheqjen graduale të forcave izraelite nga Gaza. Zyrtarë amerikanë kanë deklaruar se çdo hap i këtij procesi do të verifikohet.
Një zyrtar i lartë i Hamasit i ka thënë BBC-së se grupi ka pranuar planin, megjithëse deri tani nuk është publikuar një deklaratë zyrtare nga organizata.
Një zyrtar amerikan ka deklaruar gjithashtu se Trump “do të jetë shumë i zhgënjyer” nëse Izraeli nuk e zbaton pjesën e marrëveshjes që parasheh tërheqjen e trupave nga Gaza.
Megjithatë, disa çështje kyçe mbeten ende të paqarta. Deri tani nuk ka pasur reagim zyrtar nga autoritetet izraelite dhe nuk dihet nëse Izraeli ka qenë pjesë e negociatave që çuan në këtë marrëveshje. Po ashtu, nuk janë bërë publike detajet se si do të realizohej tërheqja e trupave izraelite dhe nëse ajo do të përfshinte edhe zonën tampon të njohur si “Yellow Line”.
Ende nuk është sqaruar as se kush do të marrë në administrim armët që do të dorëzoheshin nga Hamasi dhe si do të funksionojë mekanizmi i verifikimit të propozuar nga Shtetet e Bashkuara.