Gjermania shënon 36-vjetorin e ribashkimit, një ngjarje historike që i dha fund ndarjes së vendit në Gjermani Lindore dhe Gjermani Perëndimore dhe shënoi një kthesë të rëndësishme për Evropën.
Më 3 tetor 1990, Republika Demokratike Gjermane dhe Republika Federale e Gjermanisë u bashkuan zyrtarisht, duke i dhënë fund një ndarjeje që kishte zgjatur për më shumë se katër dekada. Kjo datë festohet çdo vit si Dita e Unitetit Gjerman.
Rruga drejt ribashkimit ishte hapur një vit më herët, më 9 nëntor 1989, kur ra Muri i Berlinit – një prej simboleve më të fuqishme të Luftës së Ftohtë. Rënia e murit shënoi fillimin e një procesi të shpejtë politik dhe diplomatik që do të përfundonte me bashkimin e dy Gjermanive më 3 tetor 1990.
Pas përfundimit të Luftës së Dytë Botërore, Gjermania ishte ndarë në dy shtete me sisteme të ndryshme politike dhe ekonomike. Ndarja u bë edhe më e dukshme në vitin 1961, me ndërtimin e Murit të Berlinit, i cili për dekada ndau qytetin dhe familje të shumta.
Ribashkimi i vitit 1990 nuk ishte vetëm një ngjarje me rëndësi për popullin gjerman, por edhe një moment që ndikoi në arkitekturën politike dhe të sigurisë së Evropës. Procesi u mbështet edhe nga marrëveshjet ndërkombëtare, përfshirë Traktatin “2+4”, i cili përcaktoi kushtet e jashtme për ribashkimin dhe rikthimin e sovranitetit të plotë të Gjermanisë.
Sot, 3 tetori mbetet një simbol i fuqishëm i kapërcimit të ndarjeve politike dhe i rrugëtimit drejt një Evrope më të bashkuar.
Në Kosovë, kjo datë ka edhe një dimension të veçantë. Ambasada e Gjermanisë në Kosovë ka theksuar se historia e bashkimit gjerman lidhet edhe me angazhimin e vazhdueshëm të Gjermanisë në Kosovë, ku trupat gjermane kanë shërbyer në kuadër të KFOR-it që nga viti 1999, duke kontribuar në paqen dhe sigurinë në rajon.