Kombëtarja e Shqipërisë do të ketë përballë Finlandën në një nga ndeshjet më të rëndësishme të edicionit aktual të Ligës së Kombeve, me synimin për ta ruajtur vendin e parë në Grupin C1 dhe për t’iu afruar rikthimit në Ligën B.
Shqipëria kryeson grupin me nëntë pikë pas katër ndeshjeve të zhvilluara, ndërsa Bjellorusia dhe Finlanda kanë nga shtatë pikë. Finlanda renditet e treta, për shkak të bilancit në përballjet direkte me Bjellorusinë.
Skuadra shqiptare ka regjistruar tri fitore dhe një humbje në katër takimet e para, ndërsa disfata e vetme erdhi pikërisht nga Finlanda, e cila triumfoi 2:1 në përballjen e zhvilluar në Helsinki më 3 tetor.
Ky takim ka rëndësi të veçantë për të dyja përfaqësueset, pasi Shqipëria me fitore do të shkëputej nga Finlanda dhe do të bënte një hap të madh drejt sigurimit të pozitës së parë. Në anën tjetër, finlandezët kërkojnë rezultat pozitiv për të mbetur në garë për kreun e grupit.
Në ndeshjen e parë mes këtyre dy skuadrave, Finlanda kishte fituar 2:1, ndonëse Shqipëria kishte kaluar e para në epërsi me golin e Rey Manajt. Përjashtimi i portierit Etrit Berisha në minutën e 22-të ndikoi në rrjedhën e takimit, ndërsa Leo Walta realizoi dy golat e fitores për finlandezët.
Ndeshja do të zhvillohet në stadiumin “Air Albania”, duke filluar nga ora 20:45.
Sfida Shqipëri–Finlandë është e para nga dy përballjet e fundit të kuqezinjve, të cilët më 15 nëntor do të luajnë në udhëtim kundër Bjellorusisë.