Dy anije tregtare janë goditur nga dronët në Detin e Zi, pranë bregdetit të Bullgarisë, ndërsa njëra prej tyre është fundosur. Lajmin e bëri të ditur kryeministri bullgar, Rumen Radev, i cili i cilësoi sulmet si të papranueshme dhe kërkoi ndihmë ndërkombëtare për të sqaruar se kush qëndron pas tyre.
Sipas autoriteteve bullgare, njëra prej anijeve, me emrin “Chelsea 3”, u godit nga tre dronë ajrorë rreth 18 milje detare në lindje të qytetit bregdetar Byala. Të 15 anëtarët e ekuipazhit u shpëtuan, ndërsa pesë prej tyre morën trajtim mjekësor për lëndime të lehta. Në mesin e ekuipazhit kishte shtetas ukrainas dhe azerbajxhanas.
Anija e dytë u godit pranë Krapetsit, në pjesën veriore të bregdetit bullgar, dhe u fundos. Deri më tani, është raportuar se vetëm një anëtar i ekuipazhit të saj është shpëtuar, ndërsa nuk janë bërë të ditura hollësi të plota për fatin e personave të tjerë që ndodheshin në bord.
Kryeministri Radev deklaroi se Bullgaria nuk ka prova të qarta për të përcaktuar se kush i kreu sulmet. Megjithatë, ai tha se rrethanat ngrenë dyshime se rezultati i këtyre sulmeve i shërben Rusisë. Për këtë arsye, autoritetet bullgare kanë paralajmëruar thirrjen e ambasadores ruse për bisedime, si dhe kontaktimin e NATO-s dhe Bashkimit Evropian për të kërkuar mbështetje.
Bullgaria synon gjithashtu të forcojë mbikëqyrjen ajrore dhe detare, si dhe kapacitetet për t’u përballur me sulmet me dronë. Incidentet e fundit kanë shtuar shqetësimet për sigurinë e transportit tregtar në Detin e Zi, në një kohë kur lufta mes Rusisë dhe Ukrainës vazhdon të ndikojë në sigurinë e rajonit.