Senati i Universitetit të Prishtinës ka miratuar një deklaratë lidhur me luftën çlirimtare të Kosovës, duke theksuar rëndësinë e trajtimit të kësaj periudhe përmes fakteve, dokumenteve dhe standardeve të kërkimit shkencor.
Në deklaratë, Universiteti i Prishtinës shpreh qëndrimin se drejtësia duhet të jetë e pavarur, e paanshme dhe objektive, e bazuar në prova, standardet e së drejtës dhe parimet e procesit të rregullt gjyqësor. Sipas deklaratës, drejtësia e qëndrueshme nuk duhet të ndërtohet mbi paragjykime kolektive.
Universiteti thekson gjithashtu se lufta e Kosovës duhet të kuptohet në kontekstin politik, shoqëror dhe humanitar në të cilin u zhvillua. Në deklaratë thuhet se lufta e Ushtrisë Çlirimtare të Kosovës ishte pjesë e përpjekjes së popullit të Kosovës për mbrojtjen e jetës, shtëpisë, dinjitetit njerëzor dhe lirisë nga represioni dhe dhuna.
Një pjesë e veçantë e deklaratës i referohet dhunës sistematike, dëbimeve masive të popullsisë shqiptare të Kosovës dhe shkeljeve të rënda të të drejtave të njeriut dhe të së drejtës humanitare. Universiteti vlerëson se këto zhvillime janë pjesë e dokumentuar e historisë së Kosovës dhe duhet të merren parasysh gjatë trajtimit të kësaj periudhe.
Në deklaratë përmendet edhe ndërhyrja e NATO-s, e cila, sipas Universitetit, duhet të kuptohet në kontekstin e krizës humanitare, dhunës së përhapur dhe dëbimit të popullsisë.
Universiteti i Prishtinës i referohet edhe opinionit këshillimor të Gjykatës Ndërkombëtare të Drejtësisë të 22 korrikut 2010, lidhur me deklaratën e pavarësisë së Kosovës.
Në përfundim, Universiteti thekson se e vërteta historike për luftën e Kosovës duhet të kërkohet përmes dokumenteve, dëshmive, kërkimit shkencor dhe debatit të hapur akademik. Institucioni shprehet i gatshëm të kontribuojë në dokumentimin dhe studimin e luftës, dëbimeve dhe dhunës ndaj popullsisë civile, si dhe në ruajtjen e kujtesës historike për brezat e ardhshëm.
Universiteti i Prishtinës thekson gjithashtu se do të vazhdojë të mbrojë lirinë akademike dhe të drejtën për studimin e historisë së Kosovës pa presion dhe pa ndërhyrje politike.