Kryetari i Gjykatës Administrative të Kosovës, Kreshnik Kaçiu, mbajti ligjëratë informuese me studentët e Fakultetit Juridik të Universitetit të Pejës “Haxhi Zeka”.
Gjatë bashkëbisedimit me studentët u theksua rëndësia e drejtësisë administrative në garantimin e mbrojtjes juridike dhe në ushtrimin e kontrollit gjyqësor në fushën administrative, në përputhje me kompetencat dhe legjislacionin në fuqi.
Në këtë aktivitet, i pranishëm ishte edhe dekani i Fakultetit Juridik të Universitetit të Pejës, prof. dr. Petrit Nimani, i cili tha se kjo ligjëratë do të i shërbejë si mundësi studentëve që të thellojnë njohuritë teorike lidhur me drejtësinë administrative.
Bashkëpunimi me Fakultetin Juridik të Universitetit të Pejës synohet të vazhdohet dhe të avancohet edhe më tutje, në të ardhmen.
Duke vlerësuar rëndësinë e bashkëpunimit me institucionet akademike, transparencën institucionale, informimin e publikut dhe avancimit të edukimit juridik, për studentët e rinj, Gjykata Administrative do të vazhdojë me aktivitete të tilla edhe në të ardhmen. Për këto qëllime, tashmë janë mbajtur ligjërata informuese me studentët e Fakultetit Juridik të Universitetit të Prishtinës dhe atë të Mitrovicës.