Ministri i Infrastrukturës dhe Transportit, Dimal Basha, ka zhvilluar një takim me ambasadorin e ri të Francës në Kosovë, Jean-François Huchet, me të cilin ka diskutuar për mundësitë e zgjerimit të bashkëpunimit ndërmjet dy vendeve.
Në këtë takim ishte i pranishëm edhe Frédéric Deshayes, atashe për bashkëpunim në kuadër të përfaqësisë franceze.
Sipas njoftimit, diskutimet u përqendruan te projektet strategjike infrastrukturore, me theks të veçantë në zhvillimin e rrjetit rrugor dhe hekurudhor të Kosovës.
Një tjetër temë e trajtuar ishte bashkëpunimi me Agjencinë Franceze për Zhvillim (AFD), e cila është partnere në mbështetjen e projekteve zhvillimore.
Ministri Basha ritheksoi përkushtimin për thellimin e partneritetit me Francën, duke e cilësuar atë si një aleate dhe partnere të rëndësishme të Republikës së Kosovës.