Japonia nis misionin historik drejt Marsit, synon të sjellë mostra nga njëra prej hënave të tij

Japonia ka nisur një mision historik hapësinor drejt Marsit, me synimin që për herë të parë të sjellë në Tokë mostra nga njëra prej hënave të planetit të kuq.

Anija hapësinore MMX (Martian Moons eXploration) u lëshua të martën nga Qendra Hapësinore Tanegashima në Japoni, me raketën H3.

Sipas Associated Press, autoritetet japoneze konfirmuan se nisja ishte e suksesshme, pasi anija u nda nga raketa sipas planit.

Misioni, i udhëhequr nga Agjencia Japoneze e Kërkimeve Hapësinore (JAXA), synon të eksplorojë dy hënat e Marsit, Phobos dhe Deimos.

Objektivi kryesor është mbledhja e të paktën 10 gramëve material nga sipërfaqja e Phobosit dhe kthimi i tyre në Tokë në vitin 2031.

Anija hapësinore pritet të arrijë në afërsi të Marsit në gusht të vitit 2027.

Në kuadër të misionit do të përdoret edhe roboti Idefix, i zhvilluar nga agjencitë hapësinore të Francës dhe Gjermanisë. Ai pritet të zbresë në sipërfaqen e Phobosit në fund të vitit 2028 ose në fillim të vitit 2029.

Roboti do të studiojë terrenin dhe do të ndihmojë në identifikimin e vendeve të përshtatshme për mbledhjen e mostrave.

Shkencëtarët shpresojnë se materiali i mbledhur do të ndihmojë në zgjidhjen e një prej mistereve të Sistemit Diellor: mënyrës se si janë formuar dy hënat e Marsit.

Sipas teorive shkencore, ato mund të jenë krijuar nga mbetjet e një përplasjeje të madhe me Marsin ose mund të jenë asteroidë të kapur nga graviteti i planetit.

Misioni, me vlerë rreth 578 milionë dollarë, realizohet në bashkëpunim me disa agjenci ndërkombëtare, përfshirë NASA-n dhe Agjencinë Evropiane të Hapësirës.

Nëse përfundon me sukses, MMX do të jetë misioni i parë që sjell në Tokë mostra nga një hënë e Marsit. /KosovaPress/