Grupi i parë i besimtarëve nga Kosova është nisur sot drejt vendeve të shenjta për ta kryer obligimin e haxhit.
231 besimtarë nga komuna e Prishtinës morën rrugën drejt Mekës, ndërsa Aeroporti “Adem Jashari” u mbush me emocione, lutje dhe përqafime mes besimtarëve dhe familjarëve të tyre.
Për shumë besimtarë, kjo eshte hera e parë që po nisen për haxh, një udhëtim që, siç thanë, e kanë pritur prej vitesh. Mes emocionesh dhe lotësh gëzimi, ata u shprehën të lumtur që po u jepet mundësia ta vizitojnë Qabenë dhe ta kryejnë një nga obligimet më madhore të fesë islame.
Për t’i përcjellë besimtarët, në aeroport ishte i pranishëm edhe Myftiu i Kosovës, Naim ef. Tërnava, i cili u uroi rrugë të mbarë, shëndet dhe haxh të pranuar, duke kërkuar që në lutjet e tyre t’i kujtojnë familjet dhe vendin.
Ndërkaq, nga Drejtoria e Haxhit dhe Umres, u bë e ditur se të gjitha përgatitjet dhe organizimi i udhëtimit kanë shkuar sipas planifikimeve dhe pa pengesa.
Këtë vit, nga Kosova do ta kryejnë obligimin e haxhit gjithsej 1576 besimtarë, të cilët do të udhëtojnë në grupe drejt vendeve të shenjta gjatë ditëve në vijim.
KLIKO PER VIDEO E PLOTE PER HAXHILERET E PARE
