Mëngjesin e sotëm, ministri i Punëve të Brendshme, Xhelal Sveçla, njoftoi goditjen e një grupi ndërkombëtar të trafikimit me narkotikë.
Në aksionin e udhëhequr nga policia, prokuroria dhe AKI-ja, u kapen 37 kilogramë heroinë, të ndarë në 62 paketime, e me vlerë mbi gjysmë milion euro.
Aksioni në fjalë u zhvillua në Ferizaj dhe në Prishtinë.
Burime pohojnë se në mesin e 5 të arrestuarve si të dyshuar, ka nga Ferizaj, Prishtina dhe Maqedonia e Veriut.
“Angazhimi ynë për mbrojtjen e jetës dhe sigurisë së qytetarëve vetëm sa do të rritet, me edhe më shumë vullnet dhe këmbëngulësi. Republika e Kosovës nuk është dhe nuk do të jetë zonë e sigurt për kriminelët, e as për aktivitetet që cenojnë sigurinë e vendit, shëndetin dhe mirëqenien e rinisë dhe të gjithë qytetarëve tanë”, shkroi Sveçla në postimin e tij, bashkë me një fotografi nga narkotikët e sekuestruar