Marrëveshja e armëpushimit në Rripin e Gazës rrezikon të shembet nëse Izraeli dhe Hamasi nuk përmbushin zotimet e tyre.
Ky është paralajmërimi i Bordit të Paqes, organit që mbikëqyr marrëveshjen e ndërmjetësuar nga Shtetet e Bashkuara të Amerikës për ndaljen e luftimeve dhe rindërtimin e territorit palestinez.
Sipas Associated Press (AP), Bordi i Paqes i ka dorëzuar Këshillit të Sigurimit të Kombeve të Bashkuara një raport, në të cilin paralajmëron se marrëveshja e brishtë mund të dështojë nëse nuk ndërmerren hapa të menjëhershëm për zbatimin e plotë të saj.
Raporti, një kopje të të cilit e ka siguruar AP, u bën thirrje Izraelit dhe Hamasit të respektojnë angazhimet e marra gjatë vitit të kaluar.
Në dokument theksohet se dallimi ndërmjet marrëveshjes së arritur dhe zhvillimeve në terren mbetet kërcënimi kryesor për procesin e paqes.
Bordi paralajmëron se një armëpushim që nuk sjell rezultate konkrete për popullsinë nuk mund të mbahet pafundësisht.
Sipas raportit, nëse marrëveshja dështon, nuk do të ketë një plan të qartë për rikthimin e procesit, vendosjen e administratës së përkohshme dhe nisjen e rindërtimit.
Sulmet dhe mungesa e ndihmave pengojnë zbatimin e marrëveshjes
Raporti thekson se sulmet e vazhdueshme izraelite dhe aktivitetet ushtarake të Hamasit kanë penguar përparimin drejt zbatimit të marrëveshjes së armëpushimit.
Megjithëse marrëveshja e ndërmjetësuar nga presidenti amerikan Donald Trump hyri në fuqi në tetor 2025, procesi ka mbetur i bllokuar për shkak të mosmarrëveshjeve lidhur me çarmatimin e Hamasit.
Drejtori i përgjithshëm i Bordit të Paqes, Nickolay Mladenov, ish-i dërguar i Kombeve të Bashkuara për Lindjen e Mesme, kishte paralajmëruar që në muajin maj se procesi kishte ngecur.
Gjashtë muaj më vonë, raporti i ri tregon se pengesat kryesore vazhdojnë të jenë të pazgjidhura.
Bordi ka shprehur shqetësim edhe për gjendjen humanitare në Gazë, ku popullsia civile po përballet me një tjetër dimër në kushte të rënda, mes tendave dhe ndërtesave të shkatërruara.
Sipas raportit, kufizimet e vendosura nga Izraeli për hyrjen e furnizimeve dhe pajisjeve, së bashku me mungesën e fondeve, kanë penguar përgatitjet për stinën e dimrit.
Bordi ka kërkuar lejimin e menjëhershëm të më shumë materialeve për strehim dhe mbrojtje nga kushtet atmosferike, si dhe hyrjen e pompave, gjeneratorëve dhe makinerive të rënda.
Izraeli kritikohet për pengimin e administratës së përkohshme
Një tjetër shqetësim i ngritur në raport është moslejimi nga Izraeli i administratës civile teknokratike, të krijuar nga Bordi i Paqes për të qeverisur përkohësisht Gazën.
Sipas dokumentit, mungesa e vendimeve nga qeveria izraelite për trajnimin, vendosjen dhe rikthimin e policisë civile në Gazë po pengon zbatimin e plotë të planit të paqes.
Këto vonesa kanë ndikuar edhe në mosvendosjen e forcës ndërkombëtare të stabilizimit, e cila konsiderohet e rëndësishme për tërheqjen e trupave izraelite, çarmatimin e Hamasit dhe fillimin e rindërtimit.
Bordi i Paqes i ka kërkuar Këshillit të Sigurimit të OKB-së të ushtrojë ndikimin e tij për zbatimin e marrëveshjes dhe të kërkojë nga palët ndërprerjen e vonesave.
Në raport theksohet se asnjëra palë nuk mund ta përdorë mosveprimin e palës tjetër si arsyetim për mospërmbushjen e detyrimeve të veta.
Bordi ka nënvizuar gjithashtu se procesi i paqes duhet të krijojë një rrugë të besueshme drejt vetëvendosjes dhe shtetësisë palestineze, duke kundërshtuar çdo veprim të njëanshëm që mund ta pengojë këtë synim.

