I lindur në vitin 1986 në Kosovë, Shpetim Qorraj u rrit gjatë një periudhe të vështirë, në një vend të përballur me luftën. Që në fëmijëri njihej si një djalë i qetë, i sjellshëm dhe I respektueshëm, me rezultate të shkëlqyera në shkollë. Ai ishte shumë i dashur nga fqinjët dhe i rrethuar me dashurinë e familjes së tij të madhe në fshatin Pëmishtë, mes Drenicës dhe Dukagjinit, një vend që ai me krenari e quan fshati më i bukur në botë.
Jeta e vuri përballë sfidave që në moshë të vogël. Vetëm 13 vjeç humbi babain gjatë luftës, një tragjedi që do ta kishte thyer shumëkënd. Për Shpetimin, kjo humbje u shndërrua në forcë dhe motivim për të ndërtuar një jetë me vlera dhe qëllim. Ai iu përkushtua arsimit, duke shkëlqyer në të gjitha lëndët. Përkushtimi i tij e çoi drejt studimeve në drejtësi, një rrugëtim i gjatë dhe sfidues që e përfundoi me këmbëngulje, disiplinë dhe besim të palëkundur në vetvete.
Pas përfundimit të studimeve universitare, Shpetimi ndjeu se jeta kishte ende shumë për t’i ofruar. Ai jetoi një vit në Suedi dhe një vit në Norvegji, duke vlerësuar bukurinë dhe mundësitë që këto vende ofronin, por zemra e tij mbeti gjithmonë e lidhur me Kosovën. Pas kthimit në atdhe, vazhdoi studimet master në të Drejtën Penale, duke dëshmuar edhe një herë përkushtimin e tij ndaj dijes, zhvillimit profesional dhe drejtësisë.
Në vitin 2011 mori një nga vendimet më të rëndësishme të jetës së tij dhe u shpërngul në Shtetet e Bashkuara të Amerikës në kërkim të mundësive dhe një të ardhmeje më të mirë. Pak kohë më vonë njohu dashurinë e jetës së tij, Kathleen Durkin, me të cilën krijoi një familje të mrekullueshme. Sot janë të bekuar me dy djem, Ronan dhe Bren, të cilët janë motivimi i tij më i madh për të punuar më fort dhe për të ndërtuar një të ardhme më të mirë.
I vendosur për të pasur sukses në vendin e tij të ri, Shpetimi themeloi biznesin e tij. Më pas bashkoi forcat me mikun e tij të ngushtë, Kastriot Blakaj, dhe së bashku ndërtuan një kompani të bazuar mbi ndershmërinë, punën e palodhur, besimin dhe respektin.
Suksesi i tyre nuk matet vetëm me rritjen e biznesit, por edhe me integritetin dhe mundësitë që kanë krijuar për të tjerët.
Shpetimi ka mbetur gjithmonë i lidhur ngushtë me komunitetin e tij. Ai beson se shërbimi ndaj njerëzve është një përgjegjësi dhe jo vetëm një zgjedhje. Ka punuar vazhdimisht për komunitetin, si në Staten Island ashtu edhe në Kosovë, duke ndihmuar familje, të rinj dhe organizata të ndryshme. Ai beson se ndryshimi i vërtetë ndërtohet përmes punës së ndershme, dinjitetit, unitetit dhe përkushtimit.
Në Amerikë, veçanërisht në Staten Island, Shpetimi është bërë një zë aktiv I komunitetit, sidomos i komunitetit shqiptar. Ai ka marrë pjesë dhe ka organizuar aktivitete të shumta që kanë bashkuar qytetarë, liderë, artistë dhe përfaqësues të institucioneve, me synimin për të forcuar komunitetin dhe për të krijuar ura bashkëpunimi.
Sot, Shpetim Qorraj është kandidat për Asamblenë e Shtetit të Nju Jorkut në Distriktin 64, duke kandiduar me mbështetjen e Partisë Demokratike. Ai synon të përfaqësojë me dinjitet çdo familje të distriktit, njerëzit punëtorë që meritojnë mundësi më të mira, drejtësi dhe një zë të fortë në Albany.
Historia e tij është historia e një njeriu që ka kaluar vështirësi, por nuk është dorëzuar kurrë. Një bashkëshort, baba, sipërmarrës dhe aktivist i përkushtuar ndaj komunitetit, Shpetim Qorraj beson se udhëheqja nuk matet me fjalë, por me veprime. Ai është I bindur se ndryshimi i vërtetë ndodh vetëm kur njerëzit bashkohen, punojnë së bashku dhe vendosin familjen, komunitetin dhe të ardhmen e fëmijëve në radhë të parë.