Kryetari i Komunës së Gjakovës dhe anëtari i Kryesisë së Aleancës për Ardhmërinë e Kosovës (AAK), Ardian Gjini, ka shpallur kandidaturën e tij për kryetar të partisë.
Përmes një reagimi publik, Gjini e cilësoi si privilegj dhe nder bashkëpunimin shumëvjeçar me kryetarin aktual të AAK-së, Ramush Haradinaj, duke theksuar se ka shërbyer përkrah tij në të gjitha etapat, nga lufta e deri më sot.
“Shqiptarët rrallë kanë nxjerrë burra si Ramush Haradinaj dhe rrallë kanë pasur udhëheqës që në rrethana jashtëzakonisht të vështira kanë guxuar dhe kanë ditur të japin aq shumë nga vetja e tyre”, ka deklaruar Gjini.
Postimi i plotë:
Të dashur miq,
Për mua ka qenë privilegj dhe nder të shërbej bashkë me kryetarin Haradinaj nën udhëheqjen e tij për kaq shumë vite. Në të gjitha etapat, në të gjitha rolet dhe në të gjitha funksionet, prej luftës e deri në këtë ditë.
Shqiptarët rrallë kanë nxjerrë burra si Ramush Haradinaj dhe rrallë kanë pasur udhëheqës të cilët, në rrethana jashtëzakonisht të vështira dhe në periudha jetike për vendin kanë guxuar dhe kanë ditur të japin aq shumë nga vetja e tyre.
Të dashur anëtarë të Aleancës, unë sot e kam shpallur kandidaturën për Kryetar të Aleancës duke qenë plotësisht i vetëdijshëm për rëndësinë e momentit dhe ndjenjat që edhe unë i ndaj me secilin prej jush.
Sidoqoftë, Aleanca është e hapur. I ka dyert e hapura për kandidatura të reja dhe, në të njëjtën kohë, është e hapur për anëtare dhe anëtarë të rinj.
I kemi tre muaj përpara. Do të punojmë jashtëzakonisht shumë që të ofrojmë opsion politik, i cili do ta kthejë Kosovën në drejtimin e duhur.
Faleminderit shumë të gjithëve.