Organizata e Veteranëve të Luftës së UÇK-së ka njoftuar ndryshimin e orarit të protestës së paralajmëruar para Kuvendit të Kosovës.
Protesta, e cila fillimisht ishte planifikuar të mbahej në orën 12:00, tani do të zhvillohet në orën 09:00, në kohën kur pritet të nisë seanca e Kuvendit të Kosovës.
Në rendin e ditës së seancës pritet të jetë edhe shqyrtimi i ndryshimeve në Ligjin për Dhomat e Specializuara të Kosovës, të propozuara nga PDK-ja. Pikërisht zhvillimet lidhur me punimet e Kuvendit kanë ndikuar në ndryshimin e orarit të protestës.
OVL-UÇK u ka bërë thirrje qytetarëve që t’i bashkohen protestës para ndërtesës së Kuvendit. Mesazhi i veteranëve është i qartë: “UÇK na bashkon, shihemi në ora 09:00 para Kuvendit.”
Tubimi zhvillohet në një kohë kur në Kuvend pritet të diskutohet ndryshimi i ligjit që lidhet me Dhomat e Specializuara të Kosovës.