Avokati i Popullit, Naim Qelaj, gjatë raportimit sot në Komisionin për të Drejtat e Njeriut, Barazi Gjinore dhe Peticione, ka deklaruar se Gjykata Speciale në Hagë ka dështuar garantimin dhe respektimin e standardeve për një gjykim të drejtë në rastin e katër ish-krerëve të UÇK-së.

Sipas Qelajt, me këtë veprim Gjykata Speciale i ka shkelë të drejtat e njeriut, dhe sipas tij, kur një gjë të tillë e thotë Avokati i Popullit i një vendi, ai nuk guxon ta thotë pa një analizë dhe pa një vlerësim të krejt situatës, raporton KosovaPress.

Ai u shpreh se sa herë ka reaguar për shkeljen e të drejtave të njeriut për ish-krerët e UÇK-së që janë në Hagë, i është thënë se ‘nuk ke mandat’, dhe siç u shpreh ai kjo ka qenë e pandershme, gjë të cilën ia ka thënë edhe kryetares së Gjykatës Speciale, Ekaterina Trendafilovës.

Qelaj tha se shqetësues për të ka qenë edhe reagimi i faktorit ndërkombëtar, duke u shprehur se krejt thirrjet “mos ndërhyni në drejtësi” janë bërë qëllimisht, në mënyrë që të mos ketë transparencë në lidhje me atë çka ka ndodhur.

Gjykata Speciale në Hagë ka dënuar më 16 shtator me gjithsej 81 heqje lirie katër ish-krerët e UÇK-së, Hashim Thaçin (25 vjet), Kadri Veselin (18 vjet), Jakup Krasniqin (25 vjet) dhe Rexhep Selimi (13).

Kuvendi i Kosovës ka miratuar më 28 shtator një deklaratë me të cilën kundërshtohet aktgjykimi i padrejtë ndaj krerëve të UÇK-së.

Qeveria e Kosovës më 14 tetor ka marrë vendim për formimin e Grupit Punues për hartimin dhe harmonizimin e Strategjisë Shtetërore lidhur me procedurat e apelit para Dhomave të Specializuara në Hagë.