Analistët politikë e kanë vlerësuar si zhvillim pozitiv tejkalimin e krizës institucionale dhe zgjedhjen e presidentes së re të Kosovës.
Sipas tyre, funksionalizimi i institucioneve është një hap i rëndësishëm për vendin, veçanërisht në një periudhë kur Kosova përballet me sfida të ndryshme politike dhe institucionale.
Publicisti Reshat Sahitaj e ka mirëpritur përfundimin e krizës, duke e cilësuar zgjedhjen e presidentes si një zhvillim të rëndësishëm për Kosovën.
“Është akt sublim zgjedhja e presidentes. Është sukses i madh i akterëve për zgjedhjen e presidentes, e cila është kryetare e Akademisë së Shkencave. Shpresoj që ajo do të kontribuojë shumë në të ardhmen për Kosovën”, tha Sahitaj.
Edhe analisti Ibrahim Shala ka shprehur vlerësim për zhvillimet e fundit, duke thënë se meritojnë përgëzim të gjithë ata që kanë ndihmuar në tejkalimin e ngërçit institucional.
“Fatmirësisht, duhet përgëzuar ata që kanë kontribuar për daljen nga kriza. Zgjedhja e presidentit është shumë e mirë dhe e drejtë”, tha Shala.
Ai ka folur gjithashtu për miratimin e ligjit për Dhomat e Specializuara, duke e konsideruar këtë një zhvillim që krijon një realitet të ri institucional dhe sjell perspektiva, por edhe sfida të reja për Kosovën.
Në anën tjetër, avokati Armend Shkodra ka mirëpritur kompletimin e institucioneve të vendit, por ka paralajmëruar se Kosova vazhdon të përballet me çështje të ndjeshme.
Ai ka përmendur veçanërisht situatën e krijuar pas aktakuzës së ngritur më 16 shtator ndaj ish-drejtuesve të UÇK-së.
“Është fatkeqësi që ndodhemi në një situatë tejet delikate për shtetësinë e Kosovës, për raportet ndërkombëtare, për shkak të pasojave që mund të ndodhin nga aktgjykimi i shpallur në Speciale”, tha Shkodra.
Megjithatë, ai ka vlerësuar se kompletimi i institucioneve është i domosdoshëm për funksionimin e shtetit dhe për përballimin e sfidave që e presin Kosovën.