Botim i ri nga Shtëpia Botuese “Dituria Islame”
Ja Resulallah! Ti je më i dashur se vetja ime!
Autor: Dr. Zenel Hajdini
Shtëpia Botuese “Dituria Islame” ka kënaqësinë t’ua prezantojë lexuesve botimin më të ri, librin “Ja Resulallah! Ti je më i dashur se vetja ime!” të autorit Dr. Zenel Hajdini, një vepër e veçantë që trajton një nga dimensionet më të rëndësishme të besimit islam – dashurinë ndaj të Dërguarit të Allahut, Muhamedit a.s.
Në një kohë kur informacioni për jetën dhe veprën e Pejgamberit a.s. është i shumtë, autori na kujton se besimtari ka nevojë për diçka më të thellë se njohuria teorike: për një lidhje të gjallë, të vetëdijshme dhe transformuese me të Dërguarin e Allahut a.s. Pikërisht këtë synon të zgjojë ky libër – një dashuri që nuk mbetet vetëm ndjenjë, por shndërrohet në mënyrë jetese, në bindje, pasim dhe përkushtim.
I mbështetur në hadithin e njohur profetik: “Askush prej jush nuk beson plotësisht derisa të jem më i dashur për të se babai i tij, fëmija i tij dhe njerëzit në përgjithësi”, autori shtjellon kuptimin e dashurisë për Pejgamberin a.s. si një element thelbësor të besimit, duke e paraqitur atë jo vetëm si emocion shpirtëror, por si kriter të plotësimit të imanit.
Me një stil të qartë, reflektues dhe frymëzues, libri fton lexuesin që ta rikthejë figurën e Pejgamberit a.s. nga faqet e historisë në zemrën dhe jetën e përditshme, duke e bërë shembullin e tij udhërrëfyes në sfidat e kohës sonë.
Ky botim vjen si një kontribut i çmuar në literaturën islame shqipe dhe u dedikohet të gjithë atyre që dëshirojnë ta forcojnë lidhjen e tyre shpirtërore me të Dërguarin e Allahut a.s., duke e shndërruar dashurinë për të në besim të jetuar dhe vepër të përditshme.
Të interesuarit mund ta sigurojnë librin në Librarinë “Dituria Islame” në Prishtinë, si dhe në stendën e Shtëpisë Botuese “Dituria Islame” gjatë Panairit të Librit “Prishtina 2026”.
Botim i ri nga Shtëpia Botuese “Dituria Islame”
