Përmbytjet shkatërruese në Indonezi, të shkaktuara nga shirat ciklonikë të lidhur me stuhinë tropikale jashtëzakonisht të rrallë Cyclone Senyar, kanë lënë të paktën 442 persona të vdekur dhe qindra të zhdukur, ndërsa dhjetëra mijëra banorë ndodhen të izoluar pa ushqim, ujë dhe furnizime thelbësore.
Ishulli i Sumatrës është goditur më rëndë, me komunitete të tëra të shkëputura nga rrëshqitjet e dherave dhe urat e shembura, ndërsa ekipet e shpëtimit po përpiqen të çajnë drejt zonave të bllokuara.
Njerëzit në Aceh, Sumatra e Veriut dhe Sumatra Perëndimore kanë raportuar mungesë totale sinjali telefonik për ditë me radhë, duke bërë që mijëra të radhiten për të përdorur pajisjet Starlink të vendosura nga autoritetet për të kontaktuar familjarët, raporton BBC.
Në shumë zona, banorët janë detyruar të përdorin motorë për të kaluar rrugët e shkatërruara dhe fëmijët janë parë duke pirë ujë shiu për të mbijetuar. Ka patur gjithashtu raporte për plaçkitje të dyqaneve për ushqim dhe ujë, pasi ndihma nuk ka mbërritur ende në disa fshatra.
Presidenti indonezian Prabowo Subianto vizitoi zonat më të goditura në Central Tapanuli, ku mbi 200 persona kanë vdekur dhe mbi 200 të tjerë janë zhdukur. Shumë histori personale pasqyrojnë shkallën e katastrofës: familje të detyruara të braktisin shtëpitë në çaste, të ngjiten në shtëpi me shtylla për t’i shpëtuar ujit ose të ecin kilometra me motorë të prishur për të kërkuar strehim.
Banorët e Aceh-ut përshkruajnë përmbytjen si “si cunami”, me shtëpi të mbuluara nga balta dhe dëme të paprecedenta. Ekspertët thonë se reshjet ekstreme – deri në 226 mm në një ditë, shumë mbi mesataren mujore – janë shkaku kryesor i shkatërrimit masiv.
Stuhitë e fuqishme kanë goditur edhe vende të tjera të Azisë Juglindore dhe Jugore. Tajlanda, Malajzia, Filipinet, Vietnami dhe Sri Lanka raportojnë gjithsej mbi 900 viktima këtë muaj, me miliona njerëz të prekur nga përmbytjet dhe rrëshqitjet e dheut. Sri Lanka është goditur nga Cikloni Ditwah, të cilin presidenti i vendit e ka quajtur “katastrofa natyrore më sfiduese” e historisë.
Ndërkohë, në Indonezi, kërkimet për qindra të zhdukur vazhdojnë, ndërsa autoritetet paralajmërojnë se bilanci i viktimave mund të rritet ndjeshëm teksa ekipet e shpëtimit arrijnë më shumë zona të izoluara