Një ngjarje globale që do të sjellë në Itali 3.500 sportistë nga mbi 90 vende, të angazhuar në 304 gara, si dhe një publik botëror të vlerësuar në rreth tre miliardë njerëz. Sot, në ceremoninë e hapjes në Itali, do të marrin pjesë edhe rreth 50 krerë shtetesh dhe qeverish nga e gjithë bota.
Është e qartë se Milano–Kortina 2026 nuk do të jetë vetëm sport; mbi të gjitha do të jetë zhvillim, inovacion dhe vizion për të ardhmen. Me një ndikim ekonomik të vlerësuar në 5,3 miliardë euro, Lojërat do të lënë si trashëgimi infrastrukturat dhe rritjen territoriale. Por ato do të jenë edhe një instrument i fuqishëm i soft power-it, që do të sjellë një forcim të qëndrueshëm të pozicionimit ndërkombëtar të Italisë.
Për herë të parë në histori, Lojërat bëhen “të shpërndara”: dy qytete simbol, Milano dhe Kortina, dhe një sistem i tërë territoresh – Lombardia, Veneto dhe Trentino-Alto Adixhe – të bashkuara nga një vizion i qëndrueshëm dhe gjithëpërfshirës. Dhe ky është sinjali i parë “politik”.
Lojërat Olimpike Dimërore krijojnë efekte që shkojnë përtej dimensionit sportiv, duke ndikuar në infrastrukturë, zhvillim territorial, zinxhirë prodhimi dhe në pozicionimin ndërkombëtar të vendit tonë.
Sistemi organizativ i Lojërave parashikon përfshirjen e rreth 18.000 vullnetarëve dhe një task-forcë diplomatike të dedikuar, me funksionarë të rinj, institucione dhe komunitete vendore. Një angazhim që konfirmon aftësinë e Italisë për të organizuar me sukses ngjarje të përmasave globale, siç e pamë edhe me Jubileun e sapo përfunduar.
>Strategji e integruar<
Në Ministrinë e Punëve të Jashtme, ardhjen e Lojërave e kemi shoqëruar me një strategji të integruar, të nisur dy vite më parë me “Zyrën për Diplomacinë Sportive” dhe të zhvilluar përmes një turneu prezantues ndërkombëtar në Evropë, Amerikën e Veriut dhe Azi, duke përfshirë sportistë, media dhe ndërmarrje.
Qëllimi ishte i dyfishtë: të vlerësoheshin territoret dhe komunitetet e përfshira dhe të forcohej imazhi i Italisë si vend inovator, i qëndrueshëm dhe mikpritës. Lojërat kanë qenë protagoniste të nismave të shumta, në Expo Osaka 2025, në forumet e biznesit jashtë vendit dhe në Ditën e Sportit Italian në Botë.
Për këtë arsye, Italia ka zgjedhur të investojë me vendosmëri në diplomacinë sportive, duke e bërë atë një komponent strukturor të veprimit të saj ndërkombëtar. Por Lojërat Olimpike përfaqësojnë edhe vlera si gara e ndershme dhe paqësore mes të rinjve nga e gjithë bota; ato kanë qenë gjithmonë simbole universale të paqes, respektit dhe përfshirjes. Në një kontekst ndërkombëtar të shënuar nga konfliktet, sporti mbetet një hapësirë e besueshme dialogu. Olimpiadat kanë lindur për paqen.
Italia e ka mbështetur këtë duke lehtësuar miratimin e Rezolutës së OKB-së për armëpushimin olimpik, të mbështetur nga Ati i Shenjtë dhe Presidenti i Republikës: një thirrje konkrete që sporti t’i bëjë armët të heshtin.
Vetëm gjatë vitit të fundit, mbi 233.000 persona janë vrarë nga dhuna e armatosur, duke shkaktuar më shumë se 123 milionë të zhvendosur. Italia vazhdon të jetë protagoniste në planin diplomatik dhe humanitar, duke u angazhuar për paqen në Ukrainë dhe në Gaza, pa harruar konfliktet më pak të dukshme, si ai në Sudan, ku miliona njerëz janë detyruar të largohen. Përmes nismave humanitare si Food for Gaza dhe Italy for Sudan, vendi ynë është në vijën e parë në mbrojtjen e popullatave civile, veçanërisht të fëmijëve, ndër më të prekurit nga pasojat e luftës.
Rast i veçantë
Pikërisht për këtë arsye, Milano–Kortina 2026 përfaqëson një rast të veçantë për të rikonfirmuar atë që jemi dhe atë në të cilën besojmë. Ne duam t’i flasim botës, përmes këtyre Lojërave, për Italinë si ndërtuese të paqes, të rritjes dhe të bashkëpunimit ndërkombëtar. “Lojërat tona të Paqes” do të jenë një angazhim që e ndajmë të gjithë.
Tajani: Italia investon në diplomacinë sportive me Milano–Kortina ndërtojmë paqen
