Kuvendi i Shqipërisë ka miratuar reformën e re administrativo-territoriale me 85 vota pro, duke hapur rrugën për riorganizimin e pushtetit lokal. Me këtë ndryshim, numri i bashkive në vend do të zvogëlohet nga 61 në 46, ndërsa 15 bashki do të përfshihen në njësi të tjera vendore.
Për miratimin e reformës nevojiteshin së paku 84 vota. Projektligji i propozuar nga Partia Socialiste u miratua pas një seance parlamentare që zgjati rreth 14 orë dhe u shoqërua me debate të ashpra ndërmjet mazhorancës dhe opozitës.
Gjatë procesit të votimit, deputetët e Partisë Demokratike tentuan të pengonin zhvillimin e tij, duke kërkuar që drejtuesi i seancës të mos vazhdonte me procedurën. Tensionet u shtuan edhe më tej kur disa deputetë të opozitës hodhën shishe uji dhe sende të forta në drejtim të kryeministrit Edi Rama, i cili ishte i pranishëm në sallë në momentin e votimit.
Rama nuk kishte marrë pjesë në debatet e zhvilluara gjatë seancës, por u paraqit në Kuvend kur po votohej projektligji. Pavarësisht kundërshtimeve të opozitës, reforma arriti të sigurojë votat e nevojshme për miratim.
Një prej zhvillimeve që tërhoqi vëmendje ishte vota pro e deputetit socialist Erion Braçe, i cili më herët kishte kritikuar publikisht hartën e propozuar territoriale. Pas votimit, Braçe deklaroi se vazhdonte të ishte kundër reformës dhe se arsyet e votës së tij do t’i shpjegonte të premten.
Pesëmbëdhjetë bashkitë që humbasin statusin e tyre
Sipas ndarjes së re, këto 15 bashki nuk do të funksionojnë më si njësi të veçanta të pushtetit vendor:
- Fushë-Arrëz
- Klos
- Rrogozhinë
- Dimal
- Poliçan
- Patos
- Divjakë
- Selenicë
- Maliq
- Këlcyrë
- Memaliaj
- Libohovë
- Cërrik
- Belsh
- Prrenjas
Territoret e tyre do të përfshihen në bashki të tjera ekzistuese. Ndërkaq, ndarja e vendit në 12 qarqe mbetet e pandryshuar.
Kur do të zbatohet ndarja e re?
Harta e re territoriale parashihet të zbatohet në zgjedhjet vendore të vitit 2027. Deri në konstituimin e organeve të reja, kryetarët dhe këshillat bashkiakë që janë aktualisht në detyrë do të vazhdojnë ushtrimin e kompetencave brenda kufijve ekzistues.
Reforma sjell gjithashtu ndryshime në organizimin e brendshëm të disa bashkive. Në tabelat përkatëse do të shtohen qytetet Kastrat, Bushat, Ulëz, Milot, Martanesh dhe Golem. Në Kurbin, emërtimi i qytetit “Kurbin” do të zëvendësohet me “Laç”, por këto ndryshime nuk krijojnë bashki të reja.
Ndryshime teknike parashikohen edhe në hartat e Vorës dhe Kamzës. Qeverisë i është lënë afat prej gjashtë muajsh nga hyrja në fuqi e ligjit për të miratuar përcaktimin teknik të kufijve të njësive vendore.
Kufizime për ndryshimet e ardhshme
Ligji i ri përcakton edhe rregulla për ndryshimet e ardhshme të njësive përbërëse të bashkive. Çdo ndryshim i tillë duhet të paraprihet nga konsultimi publik, të miratohet nga këshilli bashkiak dhe të marrë miratimin përfundimtar të qeverisë.
Po ashtu, ndryshimet nuk mund të bëhen më shpesh se një herë në dhjetë vjet. Propozimi dhe miratimi i tyre ndalohen edhe gjatë vitit para zgjedhjeve parlamentare dhe atyre vendore.
Me miratimin e reformës me 85 vota pro, Shqipëria hyn në një fazë të re të organizimit administrativo-territorial, ndërsa harta e re pritet të marrë efekt në zgjedhjet vendore të vitit të ardhshëm.