Policia Kufitare e Shqipërisë ka shpëtuar pesë anëtarë të një familjeje që rrezikuan të mbyteshin në det pranë plazhit të Jalës, në Himarë, pasi mjeti i tyre lundrues pësoi defekt për shkak të motit të keq.
Sipas policisë, ngjarja ndodhi mbrëmjen e së martës rreth orës 22:30. Pas marrjes së njoftimit, shërbimet e Policisë Kufitare u nisën menjëherë në kërkim dhe lokalizuan mjetin, ku ndodheshin një çift bashkëshortësh dhe tre fëmijët e tyre.
Të pesë u transportuan me mjetin e Policisë Kufitare në Pikën e Kalimit Kufitar Himarë, në gjendje të mirë shëndetësore.
Policia Kufitare apelon që qytetarët të respektojnë rregullat e lundrimit, të përdorin pajisjet e sigurisë dhe të shmangin lundrimin në kushte të pafavorshme atmosferike.