Ministria e Punëve të Jashtme dhe Tregtisë së Jashtme e RMV-së informon se, që nga fluturimi i djeshëm, evakuimi i të gjithë qytetarëve të Maqedonisë së Veriut nga vendet e Lindjes së Mesme, të cilët ishin regjistruar dhe kishin shprehur gatishmërinë për evakuim, ka përfunduar plotësisht.
“Me fluturimin e fundit, të pestë që u ul dje në Aeroportin Ndërkombëtar të Shkupit, u evakuuan gjithsej 147 pasagjerë, nga të cilët 119 ishin shtetas të Maqedonisë së Veriut dhe 28 ishin shtetas të huaj. Duke vepruar kështu, shteti tregoi gatishmërinë e tij për të reaguar në kohë në situata krize, për të mbrojtur sigurinë e qytetarëve maqedonas, por edhe për të treguar solidaritet me qytetarët nga vendet mike në rajon dhe më gjerë.
Këto janë fluturime të organizuara çarter, ku të gjitha shpenzimet për zbatimin e tyre i mbulon shteti.
Me zbatimin e këtyre fluturimeve, numri i përgjithshëm i shtetasve maqedonas të evakuuar ka arritur në 605.
Ministria thekson edhe një herë se siguria e qytetarëve është përparësia më e lartë, gjë që konfirmohet edhe nga fakti se evakuimi i të gjithë shtetasve të vendit që shprehën interes për t’u kthyer në vend është përfunduar plotësisht.
Njëkohësisht, ju informojmë se numri i telefonit SOS në detyrë, si dhe kontaktet e përfaqësive diplomatike dhe konsullore, vazhdojnë të mbeten në dispozicion të qytetarëve të RMV-së”, thuhet në njoftimin e MPJ-së.