Kosova po pret një sinjal nga Shtetet e Bashkuara të Amerikës për rifillimin e Dialogut Strategjik, i cili u pezullua në shtator të vitit 2025.
Pezullimi ishte bërë i ditur nga Ambasada amerikane në Prishtinë, duke u ndërlidhur me shqetësimet e Uashingtonit për veprimet e atëhershme të Qeverisë në detyrë të Kosovës.
Ndërkohë, presidentja e Kosovës, Justina Shiroka-Pula, ka kërkuar mbështetjen e senatorëve amerikanë Jeanne Shaheen dhe Dick Durbin për rikthimin e këtij procesi.
Gjatë takimit me senatorët, presidentja ka theksuar rëndësinë e rifillimit të Dialogut Strategjik si një mekanizëm për thellimin e partneritetit ndërmjet Kosovës dhe SHBA-së, si dhe për avancimin e prioriteteve të përbashkëta.
Dialogu Strategjik synon forcimin e bashkëpunimit dypalësh në fusha të rëndësishme, përfshirë sigurinë, mbrojtjen, ekonominë, energjinë dhe teknologjinë.
Rifillimi i tij shihet si i rëndësishëm për marrëdhëniet ndërmjet dy vendeve, ndërsa Kosova vazhdon të synojë anëtarësimin në NATO dhe thellimin e bashkëpunimit me aleatin e saj strategjik.
Deri më tani, nuk është bërë e ditur një datë konkrete për rifillimin e dialogut.