Dy persona kanë humbur jetën dhe qindra të tjerë janë evakuuar pasi dy zjarre shpërthyen “pothuajse njëkohësisht” të dielën pasdite në ishullin grek Salamina, pranë Athinës, njoftuan autoritetet.
Rreth 200 zjarrfikës u angazhuan për të parandaluar bashkimin e dy vatrave të zjarrit, ndërsa Salamina ishte nën rrezik të lartë për zjarre pyjore.
Zjarri i parë u raportua rreth orës 14:40 sipas kohës lokale, në pjesën jugore të ishullit dhe u përhap me shpejtësi për shkak të erërave të forta.
Rreth 20 minuta më vonë, një tjetër zjarr shpërtheu në pjesën lindore. Shkaku i zjarreve ende nuk dihet, shkruan BBC,
Sipas mediave greke, deri të dielën në mbrëmje zjarri i parë ishte vënë nën kontroll dhe evakuimet kishin përfunduar. Rreth 500 persona u larguan nga ishulli me anije.
Zjarri i parë shpërtheu në një zonë të banuar dhe të pyllëzuar në Peristeria. Zyrtari i zjarrfikësve, Vasilios Vathrakoyannis, tha se ekipet gjetën dy trupa në vendngjarje. Kryetari i qytetit u tha mediave greke se viktimat besohet të kenë qenë çift.
Ekipet e zjarrfikësve vazhduan të përballeshin me vatra të shpërndara gjatë së dielës, ndërsa për zjarrin e dytë, që shpërtheu në qytetin lindor të Selinias, u tha se nuk kishte më “front aktiv”.
Dy anije të Rojës Bregdetare dhe një anije e Shërbimit Zjarrfikës do të qëndrojnë në zonë për mbikëqyrje dhe asistencë.