Votuesit përgjatë Bregut Lindor i dhanë Partisë Demokrate një fitore të plotë të martën, duke zgjedhur kandidatë nga i gjithë spektri ideologjik i partisë, në një shfaqje të gjallë pakënaqësie ndaj presidentit amerikan, Donald Trump, pothuajse një vit pas fillimit të mandatit të tij të dytë.
Në Virginia, ish-kongresistja, Abigail Spanberger, arriti performancën më të fortë demokrate në historinë e afërt të shtetit, duke fituar me lehtësi.
Ndërkohë në New Jersey kongresistja Mikie Sherrill, prishi koalicionin që Trumpi dhe rivali i saj republikan, ish-ligjvënësi i shtetit Jack Ciattarelli, kishin ndërtuar për të ngushtuar hendekun politik në zgjedhjet e fundit në “Garden State”, shkruan CNN-i.
Në qytetin e New Yorkut, fitorja e socialistit demokrat Zohran Mamdani shënoi herën e dytë këtë vit që ai e mposhti ish-guvernatorin Andrew Cuomo – fillimisht në zgjedhjet paraprake demokrate dhe më pas në zgjedhjet e përgjithshme, ku Cuomo garoi si i pavarur i mbështetur nga Trumpi.
Fitoret e demokratëve me dallime të theksuara ideologjike nuk do ta zgjidhin shumë debatin e brendshëm afatgjatë të partisë për drejtimin që duhet të ndjekë, me një sërë zgjedhjesh paraprake konkurruese që afrohen dhe me zgjedhjet paraprake presidenciale të vitit 2028 që tashmë po duken në horizont.
Megjithatë, fushatat e tyre kishin disa pika të përbashkëta. Edhe pse zgjidhjet e tyre ndryshonin, të gjithë kandidatët u përqendruan te çështja e përballueshmërisë së jetesës. Dhe të gjithë ishin kritikues të ashpër të politikave të Trumpit.