Radio Dodona

Kryeimami i Bashkësisë Islame të Kosovës, Vedat ef. Sahiti, mori pjesë në manifestimin qendror kushtuar ditëlindjes së Muhamedit a.s në Ankara

Radio Dodona Sht 4, 2025 Pa Komente

Me ftesë të presidentit të Republikës së Turqisë, z. Recep Tayip Erdogan, kryeimami i Bashkësisë Islame të Kosovës, Vedat ef. Sahiti, mori pjesë në manifestimin qendror kushtuar ditëlindjes së Muhamedit a.s., i cili u mbajt në Kompleksin e Pallatit Presidencial në Ankara.
Ky manifestim u mbajt nën patronatin e presidentit të Republikës së Turqisë, z. Rexhep Taip Erdogan, i cili në fjalën e tij vlerësoi jetën, veprën dhe misionin e Muhamedit a.s., duke e përshkruar atë si një kandil të pashuar që vazhdon të ndriçojë botën me shëmbëlltyrën dhe mësimet e tij. Presidenti Erdogan, në këtë natë të bekuar, foli edhe për tragjedinë në Gaza, duke apeluar që kjo luftë e padrejtë ndaj civilëve të pafajshëm të përfundojë sa më shpejt, dhe u lut që paqja të mbretërojë jo vetëm në Gaza, por në tërë botën.
Në fjalën e tij, kryetari i Dijanetit, dr. Ali Erbash, theksoi rëndësinë historike dhe shpirtërore të 12 Rebiul Evelit, ditës së lindjes së Muhamedit a.s., si dhe mesazhet universale që burojnë nga personaliteti dhe misioni i tij profetik. Ai po ashtu theksoi se me rastin e 1500-vjetorit të lindjes së Muhamedit a.s. sipas kalendarit hënor, ky vit është shpallur viti që do t’i kushtohet ndriçimit të jetës dhe shëmbëlltyrës së Muhamedit për familjen.
Në këtë manifestim morën pjesë krerët e bashkësive islame nga mbarë Ballkani dhe nga shumë se dyzet vende të tjera të botës, si dhe personalitete të larta shtetërore dhe fetare. Gjatë aktivitetit u interpretuan edhe kaside, ilahi dhe salavate kushtuar Muhamedit a.s. nga orkestra presidenciale.
Aktivitetet do të vazhdojnë në Konja, ku do të mbahet një Konferencë ndërkombëtare kushtuar jetës dhe porosive të Muhamedit a.s. për familjen.

Shoqata Humanitare Bamirëse “Bereqeti” dhuron çanta me materiale shkollore në Kosovën Lindore

Radio Dodona Sht 4, 2025 Pa Komente

Shoqata Humanitare Bamirëse “Bereqeti”, e cila funksionon në kuadër të Bashkësisë Islame të Kosovës, shpërndau çanta shkollore dhe materiale të tjera përcjellëse për të gjithë nxënësit e dy shkollave fillore të këtyre vendbanimeve, në Banjë të Sjarinës dhe Tupallë të Medvegjës.
Në shkollën fillore të Banjës së Sjarinës dhuratat u shpërndanë në prani të drejtorit z. Sinisha Stankoviç, ndërsa në shkollën fillore të fshatit Tupallë në prani të drejtoreshës znj. Arlinda Kadriu.
Ky aktivitet u mundësua në bashkëpunimin dhe koordinim me imamin e Banjës së Sjarinës, Ilham ef.Hasani, duke u bërë mbështetje konkrete për nxënësit në prag të vitit të ri shkollor.
Me këtë veprimtari, Shoqata “Bereqeti” vazhdon të jetë pranë komuniteteve duke kontribuuar në fushën e arsimit dhe të mirëqenies së fëmijëve.

Urimi i Myftiut të Kosovës, Naim ef. Tërnava, me rastin e 12 Rebiul-Evelit, ditëlindjes së Pejgamberit a.s.

Radio Dodona Sht 3, 2025 Pa Komente

Të nderuar qytetarë,

Të nderuar besimtarë,

Vëllezër dhe motra!

Sonte, në këtë natë të bekuar të 12 Rebiul-Evelit, ne përkujtojmë lindjen e më të dashurit të Allahut, Pejgamberit tonë, Muhamed Mustafasë a.s., i cili është mëshira e dërguar për mbarë botët.

Kjo natë e shënuar dhe ky muaj i bekuar, i njohur si Muaji i Mevludit, na fton ta përforcojmë besimin tonë, dashurinë dhe respektin ndaj të Dërguarit të Allahut.

Pejgamberi a.s. është shembull i përsosur i mëshirës, drejtësisë, përkushtimit dhe moralit më të lartë. Ai është drita që ndriçoi njerëzimin, udhëzuesi që na mësoi si të jetojmë me dinjitet, me adhurim dhe me shpresë. Dashuria për të është pjesë e imanit tonë, ndërsa respekti ndaj tij është rruga drejt afrimit me Zotin. Allahu i Madhërishëm, në Kuranin fisnik, thotë:“Ne të kemi dërguar ty (o Muhamed) si dëshmitar, si përgëzues dhe si qortues; që të thërrasësh njerëzit tek Allahu me lejen e Tij dhe si një dritë ndriçuese.” (El Ahzab, 45-46).

Dashuria e besimtarëve për Pejgamberin Muhamed a.s. është e pakushtëzuar dhe e përhershme. Ajo nuk kufizohet vetëm në fjalë, por manifestohet në adhurim, në ndjekjen e Sunetit të tij dhe në përpjekjen për të pasqyruar moralin e tij në jetën e përditshme. Besimtarët e ndiejnë të Dërguarin a.s. më afër se çdo njeri tjetër, e përmendin me salavate, e nderojnë në zemrat e tyre dhe e shohin si udhërrëfyesin që i lidh me Krijuesin e gjithësisë. Kjo dashuri është një shenjë e fortë e imanit, ashtu siç ka thënë vetë Pejgamberi a.s.: “Askush prej jush nuk beson vërtet, derisa të mos më dojë mua më shumë se prindërit e tij, fëmijët e tij dhe të gjithë njerëzit e tjerë.”

Përgjatë shekujve, dijetarët dhe ulematë tanë e kanë kujtuar dhe nderuar të Dërguarin a.s. me vepra të vyera, me kaside, mevlude, ilahi dhe libra biografikë, që pasqyrojnë jetën dhe misionin e tij madhështor.

Kështu, dashuria ndaj Pejgamberit a.s. është bërë pjesë e kulturës sonë fetare dhe shpirtërore. Nata e Mevludit nuk është vetëm kujtim i lindjes së tij, por edhe thirrje për të ecur në rrugën e tij, për të manifestuar me vepra dashurinë ndaj tij, duke u munduar të përqafojmë moralin e tij të lartë dhe mësimet e tij hyjnore.

Prandaj, ftojmë besimtarët tanë, familjet tona dhe institucionet e Bashkësisë Islame që këtë muaj të bekuar ta kalojnë duke e përkujtuar në mënyrën më të mirë Pejgamberin a.s., qoftë në ambientet e shtëpisë, me namaz, dhikër dhe lexim të ilahive, qoftë nëpër institucionet fetare, me ligjërata, manifestime dhe veprimtari që ngjallin dashurinë ndaj të Dërguarit të Allahut.

Urime kjo natë e shënuar, me shëndet, mbarësi e harmoni për të gjithë.

Qoftë i kënaqur Allahu dhe Pejgamberi a.s. me veprat tona!

Myftiu i Kosovës,

Naim ef. Tërnava