Radio Dodona

Osmani po pret përfundimin e muajit për caktimin e mandatarit për qeverinë e re

Radio Dodona Sht 9, 2025 Pa Komente

Presidentja e Kosovës është duke pritur fundin e muajit që të vjen aktgjykimi i ri i Gjykatës Kushtetuese lidhur me çështjen e konstituimit të Kuvendit, të cilin ajo e konsideron të kryer edhe pse nuk është zgjedhur nënkryetari nga komuniteti serb.

Osmani ka thënë se pasi të skadojë masa e përkohshme e vendosur nga Kushtetuesja, “menjëherë” do t’i ndërmarrë hapat për caktimin e mandatarit për formimin e qeverisë së re.

“Na ndalohet që të ndërmarrim çdo procedurë për caktimin e mandatarit dhe krijimin e qeverisë”, ka thënë fillimisht Osmani, duke shtuar se pas shtatorit do t’i ndërmarrë veprimet që i takojnë asaj, e më pas ka thënë se “punët e tjera janë në duar të partive”. “Menjëherë pas 30 shtatorit, shpresoj që do ta kemi mundësinë me konstituimin e të gjitha institucioneve, dhe në momentin që të skadojë masa, me shpresën që do të ketë vendim në frymën pozitive të konstituuimit – po atë ditë do ta thërrasë partinë e parë dhe menjëherë do të procedojë edhe me caktimin e mandatarit. E pastaj punët e tjera janë në duar të partive, kush e krijon shumicën, si e krijojnë shumicën, si votohet qeveria, ato pastaj janë jashtë këtij institucioni”, ka thënë Osmani në një konferencë për medie.

Prishtinës i shtohen 90 autobusë të rinj në transportin publik

Radio Dodona Sht 9, 2025 Pa Komente

Kryetari i Prishtinës, Përparim Rama, ka njoftuar se flota e transportit publik në kryeqytet është pasuruar me 90 autobusë të rinj.

Në një postim në Facebook, Rama ka bërë të ditur se shumë shpejt pritet të shtohen edhe 30 autobusë të tjerë, ndërsa paralajmëroi edhe modernizimin e mëtejmë të flotës me autobusë elektrikë dhe logjistikë bashkëkohore.

“Kjo është pjesë e një transformimi të vazhdueshëm që synon një Prishtinë më të pastër, më të gjelbër dhe më të qasshme për të gjithë qytetarët”, ka shkruar ai.

Ky projekt po realizohet në bashkëpunim me partnerët ndërkombëtarë si BERZH, IFC, KfW dhe Banka Botërore.

Kliko Ketu per statusin e publikuar

“Aksioni i shembjes do vijojë gjatë gjithë mandatit”, Rama prezanton paketën e re ligjore për mbrojtjen e territorit

Radio Dodona Sht 9, 2025 Pa Komente

Ashtu siç ishte paralajmëruar gjatë nisjes së aksionit për lirimin e hapësirave publike nga kryeministri Edi Rama, qeveria ka përgatitur një paketë të re me masa ligjore për mbrojtjen e pronës dhe territorit.

Gjatë prezantimit të paketës, kryeministri Rama tha se paketa e re nuk është e përkryer por do të krijojë instrumente për ta mbrojtur hapësirën publike.

Sipas Ramës aksioni i nisur gjatë verës do të vijojë gjatë gjithë mandatit të katërt, raporton A2CNN.

“Për këtë paketë të re ligjore që do të prezantojmë është punuar me shumë intensitet nga një grup i gjerë ekspertësh, juristësh dhe me ndihmën e disa deputetëve që kanë pasur një aktivitet të lidhur me komisionin e ligjeve. Dua t’i falënderoj të gjithë ata që kanë marrë pjesë në këtë punë që është zhvilluar gradualisht gjatë gjithë periudhës së verës dhe besoj shumë që duke bërë parantezën që pa diskutim nuk është asgjë e përkryer, as kjo paketë nuk është e përkryer, por është një tërësi masash që do të na japin mundësinë të kemi në dorë instrumente të reja për të mbrojtur territorin, duke filluar nga suksesi përfundimtar i një ofensive që po do të zgjasë aq sa të jetë e nevojshme, ndoshta gjatë gjithë mandatit të ri, për ndalimin pa kthim të çdo shfrytëzimi për të ndërtuar pa leje, duke vazhduar deri te mbrojtja e autorësisë së projekteve arkitektonike, të cilat gjatë gjithë kësaj kohe që kur në Shqipëri ka filluar të ndërtohet, janë deformuar dhe përdhunuar në formën e tyre nga ndërhyrja e ndërtuesve, gjë që sigurisht i kthen në praktikisht pothuajse formale vendimmarrjet që marrin njësitë përkatëse të qeverisjes vendore. Dhe një tjetër pasojë e konsiderueshme mashtrimi që iu bëhet blerësve duke iu shitur objekte që kanë marrë leje me pamjet e lejes të paraqitura”, tha Rama.

Policia e Kosovës pranon donacion të rëndësishëm nga UNDP

Radio Dodona Sht 9, 2025 Pa Komente

Me datën 09.09.2025, Drejtori i përgjithshëm i PK-së kolonel Gazmend Hoxha me bashkëpunëtorë, priti në takim zëvendës drejtorin e UNDP-së z. Dudley Tarlton, ku edhe u bë pranim-dorëzimi i një donacioni nga UNDP.

Ky donacion synon përforcimin e kapaciteteve për sigurinë publike dhe kontrollin kufitar. dhe me këtë rast Kolonel Hoxha shprehu falënderimin ndaj UNDP-së, pasi që përmes këtij donacione për herë të parë në Policinë e Kosovës është zhvilluar dhe funksionalizuar platforma e-Learning (mësimi virtual), ku policia ka përfituar edhe trajnime të dedikuara për mirëmbajtjen dhe zhvillimin e trajnimeve të reja në këtë platformë.

Po ashtu në këtë ceremoni të pranim- dorëzimit policia ka pranuar softuerë/licenca të avancuara iBase dhe Analyst Notebook, të cilët mundësojnë mbledhjen dhe analizimin e informatave mbi rastet që lidhen me armë zjarri, municion dhe eksplozivë dhe që edhe më tutje do të ngritin efikasitetin e Pikës Kryesore të Armëve (FFP).

Përveç kësaj, 25 skanerë dore do të përdoren për kontrolle më efikase në pikat kufitare, vijën e gjelbër dhe Aeroportin Ndërkombëtar të Prishtinës, duke rritur kapacitetin operacional dhe sigurinë e qytetarëve. Përmes këtij donacioni forcohet bashkëpunimin ndërinstitucional i cili kontribuon në zhvillimin e një sistemi policor më modern dhe të avancuar.