Organizata e Veteranëve të Luftës së Ushtrisë Çlirimtare të Kosovës ka reaguar ndaj qëndrimeve të komisioneres evropiane për Zgjerim, Marta Kos, duke theksuar se vëmendja e saj duhet të përqendrohet te procesi gjyqësor ndaj ish-udhëheqësve të UÇK-së në Hagë, e jo te nismat ligjore të deputetëve të Kuvendit të Kosovës.
OVL-UÇK vlerëson se komisionerja evropiane duhet të merret me shkeljet e pretenduara të të drejtave të njeriut gjatë procesit gjyqësor në Dhomat e Specializuara, në vend që të shprehë shqetësime për vendimet dhe nismat e përfaqësuesve të zgjedhur nga qytetarët e Kosovës.
Organizata thekson se shqetësimet për këto shkelje janë ngritur edhe nga Komiteti i Avokatëve për të Drejtat e Njeriut i Anglisë dhe Uellsit (BHRC), ndaj u bën thirrje institucioneve evropiane që të mos i anashkalojnë ato.
Përmes këtij reagimi, OVL-UÇK kërkon që Marta Kos ta përqendrojë vëmendjen te trajtimi i ish-krerëve të UÇK-së në Hagë dhe te respektimi i të drejtave të tyre, në vend që të fokusohet te nismat ligjore të Kuvendit të Kosovës.