Por, në Prishtinë insistohet që tashmë pos votimit të Ligjit duhet urgjentisht të vazhdohet me hartimin e një Strategjie shtetërore për betejën juridike në shkallën e dytë ndaj ish-krerëve të UÇK-së në Hagë. Pos ligjërisht, efektet duhet të trajtohen edhe në aspektin diplomatik e politik.
Pas dhjetëra takimeve e bisedimeve Projektligji për ndryshim-plotësimin e Ligjit për Dhomat e Specializuara të Hagës kaloi edhe në lexim të dytë dhe tani pret vetëm dekretimin e Presidentes.
Krahas kësaj, vet kryeministri Albin Kurti deklaroi se për betejën juridike ndaj ish-krerëve të UÇK-së në Hagë duhet strategji shtetërore, raporton RTV Dukagjini.
Por, si duhet të procedojë tutje Qeveria për hartimin e një Strategjie për të zbutur efektin e vendimit të Dhomave të Specializuara të Hagës?
Ndonëse dënimi është i shkallës së parë, ai mund të ndryshoj në shkallën e dytë, në Apel.
Kësisoj, që verdikti të jetë ndryshe po kërkohet angazhim maksimal i institucioneve.
“Një element është jashtëzakonisht i rëndësishëm të theksohet që pala mbrojtëse ka mundësi të paraqesë edhe prova shtesë të cilat kundër argumentojnë konstatimet në aktgjykim dhe pikërisht në këtë drejtim krahas aspektit politik për sa i përket çështjes së strategjisë shtetërore në Apel duhet me u angazhu maksimalisht në kundër argumentim të konstatimeve”, ka theksuar Ardian Bajraktari, avokat.
Por, cili është plani i Qeverisë dhe a është nisur puna për këtë strategji shtetërore?
Aktgjykimi i plotë dënues ndaj katërshes së UÇK-së, nuk është bërë ende publik nga Dhomave të Specializuara të Kosovës.