Një 14-vjeçar nga Kosova është arrestuar përkohësisht nga Policia Kantonale e Aargaut në Zvicër, nën dyshimin për përfshirje në një tentativë vjedhjeje me thyerje.
Sipas njoftimit të policisë, rasti ka ndodhur pak pas orës 03:00 të mëngjesit të së shtunës, kur një banor raportoi se kishte parë një person të panjohur brenda një dhome të banesës së tij. I dyshuari ishte larguar menjëherë në drejtim të Altenburgut.
Pas raportimit, disa patrulla të Policisë Rajonale Wettingen-Limmattal dhe Policisë Kantonale të Aargaut nisën kërkimet në zonë.
Gjatë operacionit, policia gjeti një person të fshehur në shkurre në rrugën “Etzelstrasse”. Pas ndalimit dhe verifikimit, rezultoi se bëhej fjalë për një 14-vjeçar nga Kosova.
I mituri është arrestuar përkohësisht, ndërsa hetimet do të përcaktojnë nëse ai është përgjegjës për tentativën e vjedhjes në banesë.