Kryetari i Lidhjes Demokratike të Kosovës, Lumir Abdixhiku, është takuar me emisarin e BE-së për dialogun Kosovë-Serbi, Peter Sorensen.
Përmes një njoftimi, Abdixhiku deklaroi se bashkë me Sorensenin diskutuan për situatën aktuale në vend dhe proceset ndërkombëtare që e presin Kosovën.
“Theksova rëndësinë e stabilitetit institucional dhe konsolidimit demokratik në vend, si parakushte për funksionimin normal të institucioneve, për besimin e qytetarëve te shteti, për zhvillimin ekonomik, për tërheqjen e investimeve dhe për ruajtjen e kredibilitetit ndërkombëtar të Kosovës.
Në përmbyllje të takimit, shpreha pritjen që Bashkimi Evropian të vazhdojë angazhimin dhe mbështetjen për Kosovën, si në proceset e përgjithshme politike, ashtu edhe në rrugëtimin e saj drejt integrimit evropian dhe forcimit të perspektivës euroatlantike të vendit”, deklaroi Abdixhiku.